Gjergj Marku, i lindur më 9 prill 1997 në Shkodër dhe me banim në Gur të Zi, Shkodër, është një nga emrat e rinj që po ndërtojnë me përkushtim rrugëtimin e tyre në muzikën shqiptare.
Dashuria e tij për muzikën lindi që në moshë të vogël, veçanërisht për muzikën popullore shqiptare të të gjitha trevave, duke e kthyer atë jo vetëm në profesion, por në një pjesë të rëndësishme të identitetit dhe formimit të tij artistik.
Formimi i tij muzikor është i hershëm dhe i thellë.
Nga klasa e pestë deri në përfundim të maturës studioi në Shkollën Artistike “Prenk Jakova” në Shkodër, ndërsa më pas vijoi studimet për 5 vite në Akademinë e Arteve në Tiranë, ku u diplomua me Master Shkencor në Klarinetë dhe Mësuesi Muzike.
Klarineta dhe saksofoni janë instrumentet me të cilat Gjergj Marku shpreh më së miri botën e tij artistike. Me teknikë, pasion dhe njohje të traditës muzikore, ai ka qenë pjesëmarrës në aktivitete të shumta familjare e artistike në mbarë Shqipërinë, Kosovë, Ulqin dhe treva të tjera shqiptare në Mal të Zi.
Gjatë rrugëtimit të tij artistik ka pasur mundësinë të bashkëpunojë me shumë prej këngëtarëve më të njohur të trevave shqiptare dhe më gjerë, duke u bërë pjesë e skenave dhe aktiviteteve ku muzika popullore shqiptare ruhet, përcillet dhe merr jetë nga një brez te tjetri.
Gjergj Marku është shembulli i artistit që nuk e sheh traditën si të shkuar, por si një pasuri që duhet ruajtur dhe zhvilluar.
Nga Shkodra, me shkollim të lartë artistik dhe me klarinetën e saksofonin në duar, ai vazhdon të ecë përpara me një mision të qartë: ta mbajë gjallë tingullin e muzikës sonë shqiptare dhe ta përcjellë atë me profesionalizëm te brezat e rinj.
Një emër i ri, një formim i fortë dhe një dashuri e vjetër sa vetë kënga shqiptare./Pal Qarraj Portalishqiptar.com
